यस्तै छ दुबईमा .....

छाती भरी नेपाल छ , छैन है ऐस दुबईमा
बैंस गयो बिरंगमा, फ़ुल्छ कि केस दुबईमा

दही -मही, गुन्द्रुक- घिऊको तिर्खा जल्छ तन - मनमा ,
तर तिहुन सधै- सधै , ऊही 'ससेस' दुबईमा

बिरक्तिन्छ बिरानोमा , दुख्छ ऊ ताप र चापमा,
फेरी भन्छ नेपाली ज्यान, 'म छु है बेस' दुबईमा

कुच्चिसक्थे कयौं खोपडी 'नेपाली' नाम हेपिदा,
सम्हाल्नै पर्ने के गर्नु ?! 'वीर' आवेस दुबईमा

'मदनहरू' बिरामी छन, छैन 'भोटे' उपचारमा ,
घर फ़िर्ने हो कि होइन, लाग्छ आतेस दुबईमा

के संदेश पठाउँ घरमा!? के भनुँ साथीलाई?!
सास फेर्दा शूल बिझ्छ , हिंडे ठेस दुबईमा

रातको त के कुरा दिनमै ऐठन हुन्छ सत्य !!
चरेस त कहाँ पाउनु , खाइयो हरेस दुबईमा ॥